काठमाडौं । नेकपा एमालेले गृहमन्त्री रमेश लेखकमाथि लागेको आरोपबारे सम्बन्धित निकायले अनुसन्धान गर्ने बताएको छ ।
आइतबार पार्टी मुख्यालय च्यासलमा बसेको एमालेको सचिवालय बैठकपछि सञ्चारकर्मीसँग कुरा गर्दै महासचिव शंकर पोखरेलले यसबारे सम्बन्धित निकायले अनुसन्धान गरिरहेको बताएका हुन् । गृहमन्त्री लेखकको राजीनामा बारे सञ्चारकर्मीले सोधेको प्रश्नमा उनले प्रतिप्रश्न गरे, ‘आरोपको मात्रै विषयले सबैकुरा निर्धारण गर्दैन । के भएको छ भन्ने कुरा त सम्बन्धित निकायको ध्यान पुगेकै होला नि ? होइन र ?’
पोखरेलले कुनै पनि विषयमा अनुसन्धान र अभियोजन गर्ने निकायहरू रहेकाले ती निकायहरूलाई अनुसन्धान गर्न दिनुपर्ने तर्क गरे । ‘हामी आमसञ्चार माध्यम वा सामाजिक सञ्जालका माध्यमबाट अनुसन्धान अभियोजन गर्ने हक राख्दैनौं,’ उनले भने, ‘राजनीतिक दलहरूले सुशासनका पक्षमा पैरवी गर्दछन् । अनुसन्धान गर्ने निकायले अनुसन्धान गर्दछन् । दोषी देखिएहरूका कारबाहीमा पर्दछन् ।’
उनले थपे, ‘सामाजिक सञ्जाल र आम सञ्चार माध्यममा के टिप्पणी भयो भन्ने आधारमा फैसला हुँदैन ।’ उनले सचिवालय बैठकमा पार्टीकै विषयमा मात्र छलफल भएको जिकिर गरे । ‘अहिले हामीले पार्टीकै विषयमा कुरा गरेका छौं । सरकारले गर्ने काम त सरकारले गरिहाल्छ । त्यो विषयमा पार्टीले कुनै विशेष निर्देशन दिएको छैन,’ उनले भने । उनले एमालेलाई सुशासन र पारदर्शिताको नमूना पार्टी भएको बताए । ‘म तपाईंहरूलाई सुनाउन चाहन्छु निर्वाचन आयोगमा पार्टीका तर्फबाट प्रस्तुतभित्र हेर्नुभयो भने सबैभन्दा ज्यादा पारदर्शी पार्टी कुन छ आर्थिक रूपमा- नेकपा एमाले,’ उनले भने, ‘सुशासनको प्रश्नमा सबैभन्दा कम आरोप लागेको, प्रमाणित भएको पार्टी र नेतृत्व कसको छ नेकपा एमाले ।’
उनले थपे, ‘कुनै प्रश्न उठ्दा त्यसलाई गम्भीरतापूर्वक लिने पार्टी को छ नेकपा एमाले । त्यसअर्थमा यो नेकपा एमाले सन्दर्भमा यसप्रकारको प्रश्नहरू आवश्यक छ भन्ने लाग्दैन ।’
एमाले भ्रष्टाचारका विरुद्ध र सुशासन, पारदर्शिताको पक्षमा नेपालका राजनीतिक दलहरूमा सबैभन्दा अग्रणी रहेको उनले जिकिर गरे ।
